Zyra e Administrimit të Basenit Ujor është struktura në varësi të Agjencisë së Menaxhimit të Burimeve Ujore, e cila ngrihet dhe funksionon në çdo basen ujor.

Ekzistojnë 4 Zyra të Administrimit të Baseneve Ujore:

• ZABU Vjosë me qendër në Vlorë;
• ZABU Shkumbin-Seman me qendër në Fier;
• ZABU Ishëm-Erzen-Mat me qendër në Tiranë;
• ZABU Drin-Bunë me qendër në Shkodër.

Roli i ZABU-ve është shtrirja e autoritetit të AMBU në territor,  realizimi i përgjegjësive e kryerja e detyrave të agjencisë në nivel basenesh përmes:

• bashkëpunimit për hartimin e planeve të manaxhimit të baseneve dhe ndjekjes së zbatueshmërisë së tyre;
• realizimit të procedurave për pajisjen me leje/autorizime dhe monitorimin e përdorimit të burimeve ujore;
• mbledhjes dhe përpunimit të të dhënave sasiore e cilësore mbi burimet ujore

Zyra e Administrimit të Basenit Ujor ka këto detyra:

• përpilon projektin e planit për burimet ujore për basenin përkatës dhe e paraqet për miratim në këshillin e basenit ujor;
• harton inventarin e burimeve ujore në sasi dhe cilësi, si dhe bën periodikisht përditësimin e tij;
• nxit pjesëmarrjen e përdoruesve të ujit në drejtimin dhe administrimin e burimeve ujore;
• përgatit raporte, jep opinione për burimet ujore dhe i paraqet ato për ndjekje të mëtejshme në këshillin e basenit ujor;
• përgatit materialet për mbledhjet e këshillit të basenit ujor;
•  ndjek zbatimin e vendimeve të Këshillit Kombëtar të Ujit dhe këshillit të basenit ujor.